Sachsenspiegel

andrecht I 3 § 3

Nu merke we ok, war diu sibbe beginne unde war siu lende. In deme hovede is besceden man unde wif to stande, de eleke unde echtleke to samene komen sin. In des halses lede de kindere, de ane tweiunge vader unde muder geboren sin. Is dar tweiunge an, de ne mogen an eneme lede nicht bestan, unde scricket an en ander let. Nemen twene brudere two sustere, unde de dridde bruder en vremede wif, er kindere sin doch gelike na, er iewelk des anderen erve to nemene, of se evenbordich sin. Ungetweider bruder kint de stat an deme lede, dar sculdere unde arm to samene gat; also dut de suster kint. Dit is de erste sibbetale de men to mage rekenet: bruder kint unde suster kint. In deme elemboge steit diu andere; in deme lede der hant diu dridde; in deme ersten lede des middelsten vingeres diu virde; in deme anderen lede diu vifte; in deme dridden lede des (selven) vingeres diu seste. An deme sevenden steit en nagel unde nicht en let, dar umme lendet dar de sibbe unde hetet nagelmage. Diu twischen deme nagele unde deme hovede sek to der sibbe gestoppen mogen an geliker stat, de nemet dat erve gelike. De sek naer to der sibbe gestoppen mach, de nimt dat erve to voren. (De sibbe lendet in deme sevenden erve to nemene, al hebbe de paves georlovet wif to nemene in der viften; went de paves ne mach nen recht setten, dar he unse lantrecht oder lenrecht mede ergere.)


Landrecht III 62 § 1:

Vif stede, de palenze heten, leggen in'me lande to Sassen, dar de koning echte hove hebben scal. De erste is Gruna; de andere Werla, de is to Goslere geleget; Walehusen is de dridde; Olzstede ist de virde; Merseborch is de vefte.